HKKK韓國偶像特輯EP4 : 韓式綜藝遊戲派對 斗雞遊戲及炸彈舞蹈遊戲

韓式綜藝遊戲派對再次來襲,上次介紹左「一秒估歌」,今集我都會一次過介紹兩個遊戲!

 

成日喺韓國綜藝節目都會見到韓國偶像們玩「斗雞遊戲」,呢個遊戲係點嚟嘅?「炸彈舞蹈」玩起上嚟究竟又有幾驚險? 今次HKKK 繼續邀請到香港K-pop舞團 SNDHK嘅成員BEBE、Mavis、Hazel同埋韓國 K-pop舞團Flamingo成員 Junhee、Ahwon、Kyeongeun一齊嚟玩呢兩個綜藝遊戲,示範一下!

想知道遊戲有幾激烈?兩隊舞團究竟又係邊隊獲得最後勝利?佢地又會唔會受到咩懲罰?快啲click入嚟睇啦!

睇完咁激烈嘅比拼,不如就等 HKKK 嚟話你聽究竟點解斗雞叫斗雞?

韓國傳統遊戲<斗雞的由來>


由古代開始,韓國男人就好鐘意喺中秋節以摔角運動嚟助興。喺沙場上較量力氣同技術,最終勝者成為「壯士」,流傳至今成為韓國傳統競技比賽。但為咗令到大人細路都可以體會到摔角嘅趣味,所以將摔角簡化,變成咗家傳戶曉嘅「斗雞」啦!

Image by.  Gim Hongdo, 씨름

大家對斗雞呢個遊戲係咪有更深嘅了解呢?

接落嚟我哋將會傳授斗雞遊戲嘅秘技俾你,等你可以大展身手!

戰無必勝!必學斗雞遊戲秘技

Image by sportschosun

1. 喊聲鎮壓法「呀呀呀呀呀呀呀!」

一邊大叫同用銳利嘅眼神凝視對方,一邊快速咁沖向對方。增強自己氣勢之餘,亦可以減弱對方氣勢。玩遊戲最緊要咩?個勢呀!就算無技巧都好,畀你咁嚇一嚇,要羸?十拿九穩啦!

Image by 놀라운 토요일

2. 知己知彼,百戰百勝

正所謂,知己知彼,百戰百勝。 要掌握到對方嘅實力先有機會嬴。一齊嚟睇下各程度玩家嘅特徵:

 

菜鳥 – 面上顯露出無信心嘅表情,跳嘅時候姿態尷尬,容易企唔穩,捉唔啱重心。

中手 – 充滿勝負慾,一開始嘅時候會選擇拖延時間又或者無計劃地向前沖。

老手 – 充滿自信,重心同彈力之間達到一個良好嘅平衡,靜觀局勢之後以卓越嘅技術向前沖。

Image by knowing brother

3. 老手適用: 心理戰定勝負

當遇到1對1嘅局面嘅時候,心理戰就成為勝出嘅關鍵。唔好試圖去同對方正面衝突,如果唔係嘅話自己有可能會跌倒。所以最重要嘅就係要分散對手注意力,當佢重心一捉唔穩嘅時候,就乘勝追擊,殺一個措手不及!

今日分享咗咁多,你仲唔快啲同身邊一班親朋戚友玩呢個韓國偶像之間都好流行嘅傳統遊戲?

發佈留言

發佈留言必須填寫的電子郵件地址不會公開。 必填欄位標示為 *