帶你走進浪漫季節中的韓式秋季婚禮 關於韓式秋季婚禮的3個小知識

清涼又舒服嘅秋風,加上徐徐落下嘅楓葉。

喺韓國人眼中,11月除咗係「戀愛季節」之外,更係大熱嘅「結婚季節」。秋高氣爽下,接受家人、朋友嘅祝福,絕對係韓國人理想中嘅婚禮。

想知道韓國人籌備婚禮都有咩要注意?HKKK今次會介紹幾個有關韓式婚禮嘅小知識,等你去到韓國參加婚禮,都可以做個得體嘅賓客。

1. Thank You Studio:玩味滿分又獨特嘅結婚相

一入到婚禮場地,居然見到一張又一張 idol 一樣嘅海報?唔好懷疑自己眼睛,其實全部都係朋友嘅結婚相嚟㗎!

同香港結婚相好唔同,韓國人會去啲時尚感十足嘅studio影結婚相,<Thank You Studio >就係其中一間近期大熱嘅 studio,佢風格獨特,收費合理,可以話係時下年輕人影結婚相嘅首選!

Thank You Studio 更特別為秋天結婚嘅情侶打造咗名為<Thank You Wedding>嘅婚攝服務套餐,一改傳統古板生硬嘅婚攝氛圍, 以簡單方便嘅新方式,打造出好似時尚雜誌般嘅玩味婚紗照。

重點係呢個套餐嘅價錢只係由15萬至35萬韓圜不等 (即1,000 HKD – 2, 350HKD)。情侶們可以係套餐範圍內選擇適合嘅服務,仲包括埋製作婚攝短片,真係好抵架!一齊睇吓佢哋嘅之前嘅作品啦!

Image by. Thank You Studio

2. 10 by 10:韓國人超有sense禮金信封

收到韓國朋友寄嚟嘅請帖,但係唔知要點樣準備回禮?唔洗擔心,等HKKK話你知啦!

Image by. 10 by 10 , 배달의민족

韓國人參加婚禮嘅禮金信封都有所講究,唔同香港用大紅利是封,佢哋都鐘意用白色同帶有設計感嘅信封,例如印有《祝結婚》、《祝》等等有插圖或者特別字樣嘅信封。

唔知係邊度可以買到?日常小物平台 10 by 10幫到你!佢入面仲有超多唔同設計風格嘅信封,畀你慢慢揀。

去韓國參加朋友婚禮嘅話,千祈唔好帶香港嘅紅色利士封去啦,唔係就會好失禮㗎啦!

3. 花球禮物: 新娘的花球由我來守護!

韓國人相信,親友如果接到花球之後,將花球晒乾再送返俾新娘,有祝賀對方身體健康、長壽嘅意味,所以有好多人都會接到花球之後自己挑戰曬乾花。但呢個過程絕對唔可以睇少,因為風乾過程唔小心嘅話,花好容易就會整爛或者發霉㗎啦!

Image by. 에이벨 플라워

為咗避免意外嘅發生,好多花店都會提供 <花球相架>服務,由晒乾至製作一一包辦,保證你可以將花球原原本本咁送返俾朋友。

價錢大概由5萬韓圜起(即350HKD) ,你仲可以係相架加上特別嘅字句、結婚日期作為裝飾,製作一個充滿回憶嘅禮物。

講咗咁多關於韓式婚禮嘅小知識俾大家知,下次參加韓國朋友婚禮嘅時間大家識做啦!

發佈留言

發佈留言必須填寫的電子郵件地址不會公開。 必填欄位標示為 *