HKKK 韓國 cafe 推介:益善洞人氣之選!

HKKK 韓國 cafe 推介:益善洞人氣之選!

精選推介三間位處益善洞嘅 café,甜品成主⻆!

HKKK 決定每個月分主題介紹三間韓國 café,為大家帶嚟最新最地道資訊!今期就為大家帶嚟三間位於益善洞兼以甜品出名嘅 café,一齊嚟睇下!

韓國旅行行程當中,去 café 飲返杯嘢打下卡已經成為指定動作,但係成個韓國九萬幾間咖啡專門店,又應該點揀至好?HKKK 決定每個月分主題介紹三間韓國 café,為大家帶嚟最新最地道資訊!今期就為大家帶嚟三間位於益善洞兼以甜品出名嘅 café,一齊嚟睇下!

1. KAFE 溫

【充滿着溫度嘅 café】

「KAFE 溫」門口成日都係排曬長龍,點解?因為佢地嘅甜品特色滿滿,當中主打嘅就係用蒸鍋原個出爐上枱嘅蒸蛋糕啦!咁樣做可以確保蛋糕溫度,暖笠笠,同佢哋個名「溫」一 樣,而且造型滿分,啱曬用嚟打卡,所以吸引咗好多人慕名而嚟!

 

一啖咬落去,蛋糕鬆軟無比,如果想食濃味啲,可以配埋附贈嘅芝士醬一齊食,相當一流呀!而且佢哋季節限定嘅士多啤梨味蒸蛋糕同埋竹葉蒸包都好受歡迎架!至於環境,同樣呼應返 KAFE 溫 呢個名,鋪面雖然選址於現代式韓屋,但係裝修古色古香,屋頂更釆用咗部份玻璃,當太陽曬入去嘅時候可以感受到暖笠笠,成個氛圍舒服又治癒,排耐啲都抵嘅!

Instagram:

On_iksun

時間:

10:00AM ~ 11:00PM

地址:

首爾特別市鐘路區敦義洞21

2. 익선주택(益善住宅)

【 當雞蛋仔遇上韓國 style 】

익선주택(益善住宅)主打嘅甜品就係嚟自香港嘅雞蛋仔!雞蛋仔本身係韓國就好受年輕人歡迎,再加上佢哋對雞蛋仔進行咗大改造,將唔同嘅水果同奶油整成內餡加入雞蛋仔中間,齋睇已經流曬口水啦!餡料嘅選擇由士多啤梨、桃同香蕉等新鮮水果,到綠茶奶油,甚至糖漿同雪糕都有得揀,就算係見慣食慣雞蛋仔嘅你同我都未必試過! 

除咗甜品,水果茶同樣係佢哋嘅主打!最受歡迎之一就一定係士多啤梨茶,成杯都係士多啤梨片足以令每啖茶飲落都有新鮮果肉,茶底醇香濃厚,無疑係天作之合!

舖頭裝修同好多韓國舊式住宅一樣,用咗紅磚木柱去裝飾,就連餐枱都係復古風味,最啱着返個 vintage look去嘆個下午茶兼影靚相。

Instagram:

Iksun_jutaek

時間:

11:00AM ~ 11:00PM

地址:

首爾市鍾路區益善洞166-77

3. Hotel Seine Café

【韓屋村中嘅豪華酒店?】

呢間 cafe 外觀睇落好似酒店?其實佢原身真係一棟舊酒店黎!老細保留咗原有格局並將佢改裝成主題 café,外貌似足電影《布達佩斯大酒店》咁,所以一開張就吸引咗好多酒店迷,仲成為咗超熱門打卡點!

 

踏入正門,眼前嘅吧枱寫明係 concierge,加埋後面嘅鎖匙牆,一秒帶你入戲。成棟 café 有 6 層高,每層都有各自嘅主題:2 樓 3 樓分別以紅色同藍色作為主題,配合埋保留落嚟嘅酒店房門,復古感撲面而黎;4 至 6 樓就偏向工業風;天臺就會係每晚 6 點後自動變成滿月天臺酒吧,係度一邊小酙幾杯,一邊欣賞成個韓屋村景,真係好寫意。

至於甜品,選揀就多啦!無論係片裝蛋糕、法式糕點、甚至士多啤梨限定系列都有得揀,當中可麗露(Canelé)更係必食 item,仲有好幾種口味可以揀添! 眼利嘅你應該發現呢間 café 熟口熟面,因為佢曾經係 IU 主演嘅《德魯納酒店》嘅其中一個取景場地,無論作為酒店控定係韓劇迷,去首爾千祈唔好錯過呀!

Instagram:

cafe_seinejang

 

時間:

12:00PM ~ 12:00AM

地址:

首爾特別市鐘路區敦化門路11街28-5

相信如果你係甜品控,今期嘅介紹絕對啱曬你,如果你都鍾意韓國 café 嘅,除咗記低我哋嘅推介,更歡迎透過 HKKK 社交媒體平台進行交流互動架!

發佈留言

發佈留言必須填寫的電子郵件地址不會公開。 必填欄位標示為 *