HKKK 每月韓國cafe推介:梨泰院IGable網紅人氣之選!

HKKK 每月韓國cafe推介:梨泰院IGable網紅人氣之選!

精選推介3間位於梨泰院網紅必去,視覺刺激滿滿嘅梨泰院cafe!

HKKK今期為大家帶嚟三間位於梨泰院網紅口袋清單必有cafe,齊齊嚟睇吓!

去首爾旅行總有幾個地方係去極都唔厭,「梨泰院」就係其中之一。

富有異國風情,又係遊客區,衣食住行飲都齊全,就連網紅cafe 都唔少,今次就同大家分享3間充滿視覺刺激嘅韓國cafe,點刺激法?快啲睇埋落去啦!

1. C.THROUGH

【超人氣OPPA藝術拉花cafe】

Cafe主打藝術造型拉花,每一杯咖啡經過悉心設計㗎!
人氣最高嘅就梗係Cream Art系列咖啡啦,喺厚厚嘅鮮奶油上畫出「星夜」「吶喊」等嘅名畫,甚至係人物肖像,仲要期期都有唔同主題,真係少啲功力都做唔同架!咖啡上嘅圖案可以接預約,不過價錢就視乎作品嘅複雜程度啦!

另一款大熱係Scotchno(스카치노),用凍咖啡做基調灑上朱古力粉,加入大量牛奶,制造咖啡滿瀉嘅感覺,有藝術感到唔知點落口!除咗咖啡,佢哋嘅熱朱古力奶都好受歡迎,因為上面會放打好嘅奶泡同埋荷包蛋造型嘅棉花糖,外型相當可愛。

C.Through cafe除左因為咖啡造型IGable,成為網紅仲有一個好重要嘅原因:cafe 老闆 이강빈(Lee Kang Bin)顏值同佢嘅作品一樣咁高!佢本身就係一位好出名嘅咖啡拉花師,一般都會親身坐陣整咖啡,都話認真工作嘅男人最吸引人,唔少fans都係為咗同佢合照而去幫襯,唔知你又有冇心動呢?

Instagram:

c.through

時間:

12:00pm – 10:00pm

地址:

首爾特別市龍山區綠莎坪大路40Na街37

2. Le Montblanc

【唔通睇錯?Cafe 賣毛冷球?】

Le Montblanc前身係老闆丈夫所經營嘅一間紡織工廠,結業之後,老闆就將原址改裝成以毛冷球為主題嘅cafe。店內保存咗紡織工廠時期嘅回憶,無論係牆上嘅痕跡定店內留有嘅一部巨型紡織機都好點題,而 cafe 分成三層,一樓主要係點餐櫃枱同工坊,二樓係用餐空間,三樓就係天台,淨係內部裝修都已經有排影啦。

但係除咗主題獨特之外,Le Montblanc更以各種法式甜品聞名,最受歡迎一定要數 SNS 上爆紅嘅毛冷球慕斯蛋糕!你無睇錯呀!佢唔係毛冷球,而係蛋糕!一團團嘅小毛球,無論係毛線嘅紋路和定纏繞嘅方式睇落都栩栩如生,配埋粒朱古力扭扣,唔講真係會以為係真嘅毛冷球呀!

至於口味,白色嘅毛冷球就係伯爵茶同藍莓口味,而粉紅色嘅毛冷球就係黑朱古力同紅桑子口味,加上結合咗慕斯、果凍同蛋糕,口感鬆軟,絕對係睇得影得又食得呀!店裡亦有其他法式甜品例如閃電泡芙、馬卡龍等都好受歡迎㗎。

Instagram:

le_montblanc

時間:

12:00pm – 8:00pm

地址:

首爾市龍山區龍山路2街1-91 1樓 

3. The Royal Food and Drink

【擁有百萬美景嘅cafe】

The Royal Food and Drink由一位英國廚師聯同韓籍妻子一齊經營嘅cafe,整體帶有濃濃嘅英式風格,簡單隨性。店內分成三層,而最重要嘅一定係三樓嘅座席區,因為呢度有個廣闊嘅復古窗景位,由窗口望出去嘅景色就好似畫一樣,無論日景定夜景點影都咁靚,被譽為「百萬美景」,好多人都係為咗呢個窗口位慕名而嚟添!

至於餐點同樣唔失禮!店內食物以鹹點居多,而且仲有提供all day breakfast,其中Royals breakfast就相當受歡迎。一邊對住首爾靚景,一邊品嚐美味嘅地道英式brunch,絕對係一番享受!如果覺得份量太多,水果乳酪、芝士蛋糕等配一杯咖啡做下午茶都係個唔嘅選擇。

Instagram:

theroyalfad

時間:

10:00pm – 10:00pm

地址:

首爾市龍山區厚岩洞 406-58

相信今期介紹嘅韓國梨泰院cafe推介由環境嘅視覺到美食都一定可以滿足到追求完美嘅你。記住留意住我地一期嘅每月韓國cafe推介!

發佈留言

發佈留言必須填寫的電子郵件地址不會公開。 必填欄位標示為 *