推理愛情節目《Heart Signal》回歸,令你怦然心動的瞬間

推理愛情節目《Heart Signal》回歸,令你怦然心動的瞬間

韓流綜藝節目《Heart Signal》

「素人,無劇本」為主打嘅戀愛類韓綜點解咁吸引?有咩招數可以擄獲對方歡心?佢哋又去啲咩地方約會談心?今日小編就分享下呢套話題十足,路線又特別嘅韓綜啦!

素人戀愛實境騷越黎越受歡迎,《Heart Signal》作為亞洲區嘅先驅,係韓國Channel A電視台由2017年開始製作,每季節目製作組都會搵嚟8位顏值都頗高嘅年輕素人男女喺「信號小屋」中合宿一個月,佢哋照常返工、返學、追求理想、同朋友見面,但係就要喺佢哋彼此之間所釋出嘅情感信號進行推理。

第三季係2020年回歸並將會係3月25號首播!今季節目組表示要同前兩季有所區別,以「最近男女戀愛趨勢」為主題,實行將貼地進行到底,由尹施允、韓惠珍、P.O等等做主持推理戀愛心理。海報同先導宣傳片都已經釋出,究竟今次嘅嘉賓會擦出咩新火花?又會點放閃呢?千祈唔好錯過首播。但係講返轉頭,點解佢特別受歡迎?

《Heart Signal》主打「素人,無劇本」兩點,喺8個人錯綜複雜嘅互動過程營造出懸念,表現出主角們之間嘅細膩情感,加上節目形式規定只有到咗最後一集先可以向心儀對象表白,曖昧嘅氛圍吸引咗好多觀衆每集追捧,甚至覺得身同感受,就連唔少藝人,例如全昭旻、李英子都成為節目粉絲添!

雖然話無劇本,但係節目組又點會放過綜藝元素呢?節目每季都會設立一個主題,第1季以「清新的初戀純真」為主題,第2季主題變成「經歷了離別痛苦的人們,能否再次相愛」,而且主角們顏值高企,配合精緻嘅豪宅生活,兼善用觀眾嘅八卦心理,話題度十足,收視率可以話節節攀升!

節目主持仲會透過觀察主角們嘅互動,分析男女之間各種高段位戀愛心理同愛情招數,同場仲有心理專家一齊分析添。以下小編就精選咗三招同大家分享:

1) 『捉緊對方心思嘅初印象』:

「第一印象」好緊要,初次見面,如果留有好印象,之後嘅相處就會事半功倍!所以要學識唔過分咁展示出自己嘅魅力,建議可以多微笑。

2) 『不經意嘅肢體接觸』:

兩個人相處嘅時候,當女仔唔覺意同男仔發生肢體接觸,好似要捉住男方衫角,又或者傾計時輕輕嘅拍打,曖昧嘅觸碰都會令覺得對方可愛,產生保護慾。反之,男仔對女仔要保持紳士距離,但係適當嘅接觸可以令對方知道你對佢有興趣。

3) 『甜到入心嘅笑容』:

《Heart Signal》嘅女生都好識利用笑容去釋放內心嘅信號,除咗減低距離感之餘,仲會融化對方心防,相處起嚟較為舒服。

HKKK私心分享:

作為戀愛節目,又點少得約會場地?《Heart Signal 2》嘅「信號小屋」位於梨泰院,所以約會地點大部份都集中係附近。小編就私心分享兩間畀大家參考一下:

  • Seoul Ludens – 異國情調露天Café Bar

整個天台都可以飽覽整個梨泰院嘅景觀。到咗夜晚,昏暗嘅燈光加上酒精嘅作用,環境氣氛一流,喺萬家燈火嘅美景下小酌一杯,絕對係最高級嘅享受!

  • Mesiya – 男主角金賢佑嘅日式餐廳

一間店面雖小,但份外溫馨嘅日式餐廳。餐廳以廚師發辦(Omakase)形式經營,並將當日提供嘅套餐寫係門外嘅小黑板,菜式配搭都以健康為主,道道精緻,相當吸引。

發佈留言

發佈留言必須填寫的電子郵件地址不會公開。 必填欄位標示為 *