情人節「經典藍」韓式情侶裝秘笈

情人節「經典藍」韓式情侶裝秘笈

一年一度情人節又到啦,想以情侶檔姿態出街,又唔着到一模一樣?今年不妨試下用PANTONE 年度代表色「經典藍」打造幾款唔同嘅穿搭啦!

每逢情人節,唔少嘅情侶都會選擇約會嘅時候夾好情侶裝,務求大放閃光彈。但係兩個人着到一模一樣,未必適合對方之餘,更有老套之嫌。點樣可以將情侶裝打造到閃盲身邊親朋好友之餘,又可以跟上潮流?不妨參考下今日HKKK推介嘅幾種韓國情侶穿搭法,肯定可以幫到你! 

襯衫,仲要係兩套,決定顏色一定係重中之重,我哋就推介可以試下利用 PANTONE 2020 年度代表色「經典藍」出發,成件事即刻文藝曬! 

1. 「同款同色衣著」搭配法

好多情侶都會鍾意着同款式嘅單品,一嚟易襯亦最容易打造出情侶裝嘅感覺。呢種穿搭法重點係,除咗指定同款單品之外,其他嘅配搭最好可以保持返係一個色系或者同質地,令到成件事自然又統一。最實用例子就係上身「經典藍」冷衫襯白色米色系直腳褲,提升藍色嘅魅力,又或者以不同風格黑色上衫配合同款牛仔褲,打造各自風格。 

2. 「上下倒轉」搭配法

「上下倒轉」係指男女將造型上下身嘅色系配搭相反,好似男友着「經典藍」衛衣或者冷衫配黑色九分褲,女友就倒轉着黑色墊肩上衫配「經典藍」高腰半截裙。呢種穿搭嘅方法係韓國大行其道,因為造型可以跟返自己個人風格行事,但係緊扣情侶裝嘅主題,企埋一齊閃得嚟又做返自己,適合低調嘅你。 

3. 「百搭恤衫」搭配法

講到情侶裝嘅穿搭,恤衫一定係首選。女仔可以以「經典藍」恤衫配半截短裙,又或者揀連身恤衫裙,而男友就以同色恤襯條西襯或牛仔褲就搞掂。係配飾或者細節方面,一樣可以揀返一個色系襯返一套就完美啦!藍色恤衫作為經前時尚單品,相信再唔鍾意行街買衫嘅男仔點都會有一件,絕對係簡約安全之選,無論想要簡單款定係要成熟款,都襯得到呀! 

韓國情侶們嘅情侶裝穿搭法係咪好犀利呢?睇完呢幾種技巧,不妨今年情人節都同你另一半試下用「經典藍」打造最潮情侶裝啦!

發佈留言

發佈留言必須填寫的電子郵件地址不會公開。 必填欄位標示為 *